昨晚（5 月 23 日）一集《神耆小子》，鄭則士（Kent 哥）和曹永廉兩父子的關係愈趨緊張！劇情講到錢萬世集團推出的特別版牛肉乾大受歡迎，但原來是繼來（曹永廉飾）在醉酒下意外改了配方所致，後來繼來鼓起勇氣下跪向大海認錯，豈料此時竟傳出有 KOL 吃了特別版牛肉乾後敏感發作，鬧得滿城風雨！專橫的大海怒火中燒教訓繼來，不欲再做「廢太子」的繼來爆 Seed 反擊，兩父子爆發激烈罵戰。
影帝級演技
Kent 哥在這場戲大晒影帝級演技，含淚教仔一幕，盡顯對兒子愛之深責之切的感覺，亦流露出老無所依的無助感，演出觸動人心。至於飾演繼來的曹永廉亦吸獲不少好獲，網友留言：「阿爸太強勢又唔信自己，鬱鬱不得志又無奈，佢做到這種感覺」、「我有啲同情佢，曹永廉個樣無辜辜咁都幾啱佢演」、「其實曹永廉做戲幾自然，演忠奸都似。」
另一邊廂，風暴「溏心」來襲。子勇（蕭正楠飾）和有方（傅嘉莉飾）在裴正堂做防風準備期間，兩人終解開心結，表達愛意，最終舊情復熾，上演溏心之吻，浪漫滿瀉。
曹永廉又搞出大頭佛，激到 Kent 哥飛起。
Kent 哥大晒影帝級演技，含住泡眼淚教仔，好有戲！
蕭正楠同傅嘉莉表達愛意。
「溏心風暴」之吻，Sweet 到爆呀！
走佬戲拍足 4 日
昨晚另一焦點是飾演 Jack 的吳子冲，劇情講到小鮮肉 Jack 在打風期間上玫瑰（樊亦敏飾）屋企陪她，此時大海突然回家，嚇到 Jack 爬窗落荒而逃。子冲半裸上陣拍攝這場走佬戲，除了爆肌身材吸睛，狼狽走佬的樣子同樣過癮！
講到擒窗走佬戲，子冲透露前前後後拍足四天。「拍嘅時候係夏天，拍外景淋雨戲冇問題，但拍廠嘅時候就好凍，一邊淋水再加冷氣。雖然同事準備咗大量毛巾保暖，但我唔想拍每個 shot 都要抹身，又要淋返濕個身。咁多步驟麻煩到同事，所以情願 Cut 機後，原地跳做運動保暖。」子冲續指場口動作戲不算太難，只是基本攀爬動作，又謂難忘幕後同事的「特別」照顧。「拍外景嘅時候，幕後同事玩水玩得好開心，為咗想我演繹出難堪嘅感覺，所以佢哋 keep 住射我塊面，佢哋見我愈難堪，佢哋就愈開心！」
多了一個家姐
子冲身為劇中「除衫擔當」，笑言角色最大難度是 Keep 住身形。「除咗要除衫，個角色喺設定上都係一個高大有肌肉嘅陽光男孩，因為冇乜時間做準備，所以我咩招都攞晒出嚟，揀咗『168 斷食』, 加高蛋白質 Diet，再日日做 Gym！」
提到與樊亦敏有不少對手戲，子冲笑言：「好似多咗個家姐咁，佢好照顧我。除咗成日請食消夜之外，仲會成日同我研究劇本。雖然今次係第一次同佢合作，但覺得佢係一個溫文爾雅、好識得照顧人嘅好前輩！」
吳子冲與樊亦敏有不少對手戲。
吳子冲再度剝衫，晒爆肌搶 Fo 。
子冲為了除衫的場口，搞到冇淡好食。