昨晚播出嘅一集《中年好聲音 3》為「導師分組賽」下半場賽事，繼續以千禧歌曲為主題，挑戰陳奕迅、許志安和古巨基作品。本回三甲誕生，分別為 〈想說〉 劉洋＋郭偉倫 93 分、 〈傷追人〉 黃博 92 分黃博、 〈愛與誠〉 張與辰 91 分。上下半場總分由紅組以 507 分領先，藍組以 486 分屈居第二，綠組比藍組低 1 分，以 485 分排第三。
韋綺姍發現劉洋好 cute
「紅組」劉洋及郭偉倫獻唱 〈想說〉 獲得 93 分，成績亮麗，為整個回合最高分。本為動畫歌手的郭偉倫跳出「配音框框」表現獲讚，得悉分數後激動落淚，與拍檔劉洋輪流與台下導師韋綺姍擁抱。評審周國豐讚郭偉倫進步不少，「Rita 老師加埋劉洋畀你嘅壓力，你今日唱得好穩，變咗要挑剔瑕疵確實係幾難，我曾經諗過係咪要畀 20 分你哋！」續形容劉洋如「大炮」般，唱功威力驚人：「你直頭想食人咁滯！」劉美君亦讚劉洋組是表現最好的一組：「最攞到我個心，我覺得佢哋同我講緊嘢，係一個非常之成功嘅 performance 。」劉洋更被劉美君選為 MVP（最有價值選手），獲讚表現最穩的選手。韋綺姍作為資深音樂導師，自揭初時其實「有少少驚劉洋」。「因為佢好有自己想法，變咗好擔心，但原來佢好 cute，肯接受（意見）㗎！」
尤詩郡與胡家健被淘汰
本回不但誕生第一位 MVP，按照賽制下半場及回合總結，評審共淘汰兩名參賽者，為全場最低分的是「綠組」尤詩郡和胡家健。二人獻唱 〈會過去的〉 獲 74 分，表現強差人意，一同被淘汰，尤其最尾段的同步對唱遭劉美君狠批聽到哽耳，周國豐形容此曲為「跳水歌」，十分講求同步感。張佳添指此曲不適合兩人唱，並說：「家健唔適合唱千禧歌，詩郡強項亦唔係廣東歌，但接咗好鬼難唱嘅千禧歌，點消化首歌係關鍵。」尤詩郡被 foul 時感觸落淚，自認單親媽媽既要工作，又要頻頻來港訓練兼比賽絕不容易。「行到呢步已經好賺到！」作為母親的肥媽和車婉婉零舍感觸，被感動落淚，而不少參賽者亦聽到眼濕濕，場面感人。
善玥澄古裝 look 被指似鬼故
另值得一提的，「綠組」善玥澄與李金凱合唱 〈1874 〉，雖然前者在末段走音甩 key，演出僅獲 84 分，但論兩人同樣抱病在身，整體演出達到如此水準，可謂相當不錯，連向來嚴謹的劉美君也開口安慰感觸落淚的善玥澄。「後尾先 crack 咗幾吓，一路都好好，唔好喊，I love you！」場面勁有愛。
肥媽和張佳添則對李金凱動人聲線大力讚賞，添 Sir 直言很喜歡李金凱的口音。「好特別，我係鍾意聽你啲口音，證明你唱歌個 mood 好識講故仔。」周國豐則被善玥澄的古裝 look 撐傘演繹嚇親，笑言似鬼故。
