剛完成三場演唱會的炎明熹（Gigi）稍作休息後，於上周六（4 月 20 日）出席由「炎明熹粉絲後援會」舉辦，特別在 Gigi 生日月進行的捐血及義賣日活動。她說：「今次活動由舊年七月開始籌備，當時我都未知可唔可以出席到，所以今日好開心可以同歌迷一齊做善事。除咗捐血之外，我哋仲有個義賣區，收益扣除成本全數捐贈 APF 愛培自閉症基金，為來自基層嘅自閉症小朋友提供 ABA 治療以及為佢哋嘅家庭提供支援服務。」
做善事失望而回
去年 4 月「炎明熹粉絲後援會」首次舉辦大型慈善活動，為基督教聯合醫院病童籌款，在 Gigi 生日月送上不一樣的祝福。到今年的捐血義賣日，除了部份義賣精品一早被歌迷搶購一空，當日亦有接近一百位歌迷報名捐血，每位成功捐血的粉絲可獲贈印有卡通版 Gigi 的「Gi 囡鎖匙扣」。
身為偶像的 Gigi 亦打算以身作則捐血救人，還笑言不怕痛，只在小時候試過一次打針打到喊。只可惜 Gigi 去到捐血現場，閱讀捐血守則時，才發現服用過中藥不能捐血。 Gigi 即時扁嘴，還用「好失敗」來形容自己，表現得非常失望。
Gigig 因為服用了中藥，未能捐血，只能失望而回。
期望辦海旁 busking
提到活動前一晚，與歌迷在社交網站開 Live，分享演唱會點滴。 Gigi 坦言尾場完 show 一刻，激動得不斷落淚，內心非常不捨。這段時間，腦海仍不時浮現演唱會的畫面。「當晚都有開心嘅時刻，因為終於可以飲汽水。到第二日，因為爸爸媽媽同細妹要走，陪完佢哋飲茶送佢哋離開，我就返屋企執屋，之後打邊爐，因為做 show，我會避免食濃味同刺激嘅食物。另外，嗰晚有歌迷提議我搞 busking，以前十三、四歲都試過兩次喺尖沙咀碼頭 busking 。嗰陣心情好緊張，因為未試過咁多人圍住聽我唱歌，而家都好想再試吓去海旁 busking 嘅感覺，希望大家可以嚟支持，不過未知幾時會搞。」
有近 100 名粉絲參與捐血活動。
預告籌備跳唱新歌
提到演唱會跳唱環節外界一致讚好，Gigi 也收到了大家的意見，並預告正籌備一首跳唱歌，滿足樂迷的同時，也是對自己的一個挑戰。「已經揀咗歌，但未開始錄音，因為仲研究緊點樣可以再做好啲，首歌你會幻想到有一個人、戴住頂帽喺度噠手指好有型，希望首歌可以做到我哋想要嘅效果，或者俾大家見到另一種風格嘅 Gigi 。」
歌迷會特別製作義賣精品，供歌迷購買。
黑膠唱片賣斷市
上周六除了是後援會的慈善活動，也是 Gigi 人生第一隻實體唱片推出的大日子。為響應香港唱片店日，Gigi 的第一首派台歌 〈真話的清高〉，被印製成 7 寸黑膠唱片發售。由於是限量發行，多區的唱片店外出現通宵排隊等唱片店開門的人龍，據知因為每間店舖入貨量有限，在捐血日當天便有歌迷說自己排第三個都買不到，甚至有歌迷在買賣網站出價九千元，求好心人割愛轉讓唱片給他。一碟難求，Gigi 對此表示：「我知道外間銷情都好緊張，有歌迷凌晨四點已經開始排隊，知道呢個消息感動到起雞皮。好多謝大家嘅支持，自己都唔知有冇辦法可以留到隻碟送俾屋企人，如果真係冇晒貨，我會將我自己手上呢隻碟，送俾佢哋。」
不單只買碟支持，後援會更於港、九兩大旺區銅鑼灣及尖沙咀，買下 LED 廣告屏幕，播放 Gigi 的全新主打歌 〈還有一艘救生艙〉 。 Gigi 出席完捐血活動後，親自去到尖沙咀拍照打卡，感謝粉絲對她的支持。
Gigi 替成功購買到實體唱片的歌迷簽名。
Gigi 與一眾參與活動的粉絲大合照。